An overenn santél
           Eskopti Gwéned          
              

Aotrou Sant Iouan benniget,
a lein an néañv or sekouret.
O patrom lan a garanté
kleùet pedenn ho pugalé.

 

1-Sant Iouan, or patrom santél,
a zo ganet é Breizh-Izél
àr zouar Minihy, é bro Tréger,
E Kermartin, én ur manér.

 

2-Revo é vuhé ur miloér
a ziskoei deom splann on devér !
Eid boud euruz geton én Né,
biùam santél èdon eùé.

 

3-A vezul ma kresk Sant Iouan
Ennon ar vertuioù kaéran
 é wéler é splannein bamdé,
a drest peb tra é garanté.

 

4-A greiz é galon Sant Iouan
a gar Doué, a gar an Nésan.
A dra sur brasoh karanté
N'hell boud kavet nameid én Né.

 

5-De voud beleg pen dé galùet
é santelezh a gresk perpet,
ha ean a labour noz ha dé
eid gounid inéanoù de Zoué.

 

6-Hanval doh Jézus, or Salvér
D'an oll ne zisko meid doustér,
ha pegement a dud èlsé
a zégas éndro devad Doué !

 

7-Ne chonj bamdé meid um salvein ;
é plijadur a zo pedein ;
liès én noz, liès én dé
éma daoulinet dirag Doué.

 

8-D'ar penijennoù kaletan
heb àrsaù um daol Sant Iouan.
eid é viùans, èl ur gwir peur
N'en-des nameid bara ha deur.

 

9-Plouz hebkén a zo é wélé
Ha mem an douar nuah gwéhavé.
Dén a noblans, pinùig meurbet,
neoah peur é viùo perpet.

 

10-E vadoù a zo d'ar ré geih :
ged pegement a vadelezh,
ged pegement a larganté
a ra an alézon dehé !

 

11-An dud peur, an intanvézed,
ar vugalé énevaded
a gav sekour geton perpet,
ha geton émant dihuennet.

 

12-E Rouan, é Tours hag é Pariz
éma bet keùet é tiviz ;
ne vé gellet kavet ér vro
Gwel avokad pell tro-ha-tro.

 

13-De getan, person é Trédréz
Parrézig distér àr ar méz
Ged an oll éma inouret
ha ged an oll éma karet.

 

14-Oeit é goudé de Lohanneg
Er barrèz-man, biskoah béleg
n'en-doé labouret èl ma hré
eid diskein d'an dud hent an Né.

 

15-Deit é én termén devéhan,
ha Doué a lar de Sant Iouan
Diléz ar vro-men a hlahar
eid moned d'ar joéioù heb-par

 

16-Bremen étal an Aotrou Doué
Braseit é hoah é garanté ;
Pedam geduz or Sant Patrom
ha goulennam é hoarnasion.

 

17-Ha pe vé Sant Iouan pedet
kentezh é zorn 'zo astennet
eid rein sekour ér hlinùedoù
Hag eid gwellad peb sort drougoù.

 

18-Ar gelloud en-des aberh Doué,
ma hélier ar wirioné,
de ziluiein an aférioù
de rein termén d'ar prosézioù.

 

19-O Sanbt Iouan, dohom sellet
aman én ho iliz tolpet.
bet on avokad dirag Doué,
sekouret-ni pad or buhé.

 

20-Sekouret-ni, Patrom santél
eid ma véem perpet fidél,
fidél de Zoué on badéent,
èl ma oé on tadoù agent.

 

21-Sekouret-ni é peb dobér,
o Sanbt Iouan, lan a zoustér ;
groeit deom kerhet àr ho pazoù
eid boud lodeg én ho joéioù.

 

22-Doué on-es kement ofanset
ma on-es drougoù méritet.
O Sant Iouan, lan a druhé
pelleit dohom an drougoù-sé.

 

23-Ag ho iliz éraog moned,
O sant Patrom ar Vretoned,
ho perhinderion a lar deoh
Skuillein àrnehé ho pennozh.

 

24-Ha d'ar bewarved sul a viz mé,
hwi o gwélo hoah benn ar blé
Dirag ho relégoù stouiet,
Aotrou sant Iouan benniget.