An overenn santél
           Eskopti Gwéned          
              

Pedenn de zigor

 

Aotrou Doué, hiziù, dré vistér ar Pentekoust, é lakeit de voud santél ho iliz émesk an oll bobloù hag an oll vroioù : skuillet donézonoù ar Spered Santél àr ar beb abeh ha kendalhet, é kalonoù ar ré a gred énnoh, al labour a garanté ho-pes komanset kenteh man dé bet predéget an Aviél
Dré Jézus…

 

Pennad tennet a Livr Obéroù an Apostoled

 

En achiùmant a zéioù ar Pantekoust, hantér-hant dé goudé Pask, éh oé an oll disipled an eil ged égilé én ur mem léh, ha chetu én un taol deit ag an néañv, un trouz hanval doh ur bar-aùél kriù hag a laka de zasonein rah an ti ma oent énno.
Hag ind a wél a beb tu èl teadoù tan, hag unan é poéz ar beb unan anehé. Ha chetu ind, lan ag ar Spered Santél, doh en em lakad de gomz peb lavar èl ma o dougé ar Spered santél d’er gobér.

 

Boud a oé nezé é Jéruzalem Juifed, tud a zoujans Doué, deit d’énno a gement bro zo édan an héol. E kleùed trouz an aùél en-doé huéhet, ind a za a vostad én dro d’an ti, hag a chom bamet a pe gleùant an Apostoled é komz lavar peb unan anehé.

Oll éh oent èl beziùet, hag én o souézh ind a laré an eil d’égilé : Rah an dud-sé a zo é komz dohom, ha nen dint ind ag ar Galilé ? Penaos enta o hleùam-ni é komz lavar peb unan ahanom ?
Parted, Méded, Elamited, tud ag ar Mézopotami, ag ar Judé, hag ar Hapados, ag ar Pont, ag an Azi, ag ar Friji, ag ar Panfili, ag an Ejipt, a gornadoù bro al Libi étal Sirén, hag ar ré a zo deit a Rom, Juifed dré ar goéd pé dianvézerion chujet d’ol lézenn, Kréted hag Arabed, oll en o hleùam é téviz, é lavar or bro, burhudoù an Aotrou Doué.

 

Psalm 103

 

Aotrou Doué, digaset deom ho Spered
A reneùé dremm an Douar

 

O me iné, benniget an Aotrou Doué ;
Men Doué, hwi a zo ken braz !
Pegen nivéruz, Aotrou Doué, ho obéroù !
Lan é an douar ged ho oll vadoù.

Kemer a hret o anal ha chetu ind marù
Deit éndro de voud huen.
Kas a hret o anal, krouéet ind ;
Hwi a reneùé dremm an douar.

 

Gloér d’an Aotrou Doué de virùikén !
Revo é leùiné an Aotrou Doué dré é obéroù !
Revo plijuz mem barhoniezh dehon ;
Eh on é leùiné ged an Aotrou Doué

 

Pennad tennet a lihér St Paol d’ar Roméned

 

Mem bredér,
Plijadurioù an natur-dén a ya a éneb Doué. Ha dra sur, ne viùet ket revé an natur-dén med revé ar Spered Santél rag éma ar Spered Santél é chom énnoh.
An hani n’en-des ket Spered ar Hrist, hannezh nen dé ket dehon.

Med mar dé ar Hrist énnoh, ar horv a zo, ha gwir é, chujet d’ar marù, én arben ag ar péhed med ar Spered ho kas d’ar vuhé perag éh oh deit de voud just.
Ha ma chom énnoh Spered an hani en-des adsaùet Jézus a-vesk ar ré varù, hannezh hag en-des adsaùet  Jézus ar Hrist a varù de viù, a rei buhé eùé d’ho korvoù marùél, dré ar Spered a zo é chom énnoh.

Elsé, mem bredér, nen dom ket sklaved chujet d’ar horv eid biùein revé é lezennoù. Rag mar biùet revé lézennoù ar horv, hwi a gavo ar marù ; med mar dalhet ar horv ranjennet édan lézenn ar spered, hwi ho-po ar vuhé.
E gwirioné, oll ar ré a zo rénet ged ar Spered Santél a zo bugalé de Zoué. Ne hues ket reseùet ur spered a hrehé deoh krénein ged eun, èl sklaved, mes ar Spered en-des groeit ahanoh bugalé de Zoué hag a hra deoh lared « Abba, me Zad ! » ha chetu penaos é testoni ar Spered ean-mem én don or halonoù éh om gwir vugalé de Zoué. Mar dom bugalé, ni a zo eùé hériterion, ya, hériterion de Zoué, ha lodeg ged Jézus-Krist én é oll vadoù

 

Veni Sancte Spiritus

Spered Santél, Spered glan,
Deit, digaset ag an néañv
Sklerdér én or speredoù

 

Deit o Tad ar beurerion,
Deit mammenn peb donézon
Deit splanndér ar halonoù.

 

Hwi zo gouarnour an inéan
Hwi zo hé honfort gwellan
Freskoni, doustér heb par.

 

Hwi zo diskuizh él labour
Én toemdér, kloarizion flour
Ha leùiné ér glahar.

 

O splanndér deit ag an néañ
Um strèùet én on inéan
Ma vo deoh perped fidél

 

Heb ar sekour a ho krès
É kalon mab-dén n’en-des
Nitra glan, nitra santél.

 

Me zo louz : deit d’em hoalhein
Me zo séh : deit d’em mouistein
Me zo klañv braz : gwelleit dein.

 

Me zo stenn : deit d’em flégein
Me zo kromm : deit d’em eañnein
Me zo yein sklas : toemmet dein

 

Ged fians braz, ni ho ped
D’ho pugalé dakoret
Ho seizh donézon santél.

 

Reit deom ar wir santelezh
Reit deom ar salvedigezh
Reit ar joéioù éternél

 

Elsé revo groeit.

 

Alleluia

Deit Spered Santél.
Lanet kalon ho pobl fidél.
Intanet énné tan ho karanté.

Alleluia

 

Aviél

Aviél Jézus-Krist revé Sant Iehann

En amzér-hont, Jézus a laré d’é zisipled ma me haret, miret men gourhemennoù.
Me a bedo me Zad ha ean a rei deoh ur Honfortour aral ha ean a a chomo genoh de virùikén

Più bennag em har a viro me homzoù, ha me Zad er haro, ha ni a zei devaton, ha ni a chomo geton.
An hani n’en-des ket karanté dohon ne vir ket me homzoù. Hag ar homzoù ho-pes kleùet genein n’int ket me homzoù-mé, mes komzoù an Tad en-des men davéet.
Laret em-es an traoù-sé deoh, épad ma on genoh. Mes ar Honfortour, ar Spered Santél, hag a vo davéet deoh a-berh me zad, é me hanù, hannezh a zisko deoh peb tra hag a zégaso chonj deoh a oll ar péh em-es laret.

 

 Pedenn àr ar provoù
 

Plijet genoh, Aotrou Doué, sellet penaos éh om doh ho kortoz ; dalhet sonj a bromès ho Mab. Groeit ma anaùeem ged sekour ar Spered Santél muioh mui ar mistér santél éh om é lidein ha ma vo digoret deom ar wirioné penn der benn.
Dré Jézus…

Pedenn goudé ar Gomunion

 

Aotrou Doué a zakor d’ho Iliz madoù an Néañv, miret enni ar hrès ho-pes reit dehi ; groeit ma vo berped nerhuz anal ar Pantekoust ; groeit ma hello ar pred-man santelleit ged ar Spered lakad ar bed abeh moned d’ar salvedigezh.
Dré Jézus

Bennozh meur de achiù

 

Hiziù an dé, an Aotrou Doué, Tad peb sklérijenn, en-des kaset ar Spered Santél de Zisipled ar Hrist.
Revo énnoh donoh don ar Spered-man a gas deoh é donezonoù.
Amen

Revo fondet ennoh, é kreiz ho kalonoù, oll an traoù fall ged an tan deit ag an néañv àr an disipled, kaset de lakad é sklérijenn dré ar bed abeh.
Amen

Ar Spered Santél é en-des dastumet ar pobloù, ged lavarioù dishanval, én ur memes fé ; groeit ma talhent de voud fidél d’ar fé biù-sé én un espér dé an Aotrou Doué.
Amen