An overenn santél
           Eskopti Gwéned          
              

 

Incomplet

 

 

Pennad-skrid tennet a Livr ar Furnéz (Sg 11, 23-12, 2):

 

 Salvér, dré ho kelloud, hwi a gemér truhé é kevér an oll dud. Cherrein a hret ho taoùlagad àr o féhedoù eid ma teint éndro de Zoué.

E gwirioné, é karet rah ar péh a zo biù ; n'ho-pes ket donjér de hañi, rag n'ho pehé ket krouéet an dén én un devoud kas dohton. Ha penaoz en-devehé-éan biùet mar ne fallé ket deoh ?

Penaoz en-devehé-éan gouarnet é vuhé mar n'ho pehé ket éan galùet ? Mez truhé e-hues é kevér an oll dud, rag deoh-hwi émant, Mestr, hwi hag a gar ar vuhé, hwi hag a hwéh ar vuhé peurbaduz dré ar bed abéh.

Ar ré a zo é kouéhel, o derhel a hret éndro, én ur rein an avizoù mad, én ur tégas sonj perag é hrant péhedoù, eid ma um ziwalleint doh an droug ha ma helleint kredein énnoh, Salvér.

 

Psalm 144

 

Kerham get leuiné ar hent en Aotrou Doué

 

Mélein a hrein brasted men Doué ha me Roué

Me bennigo ho(us) hanù a oll viskoah de virùikén

M'ho pennigo bamdé

Mélein a hrein ho(us) hanù a oll viskoah de virùikén

 

Ar Salvér a zo tinérded ha truhé

Derhel a hra é gounar, lan é a garanté ;

Madeleh an Aotrou Doué a zo d'an oll

E dinérded d'an oll é obéroù

 

Groeit, ô Salvér, ma ho trugaréka ho(us) obéroù

Ha ma taol ho fidéled o bennoh àrnoh.

Ind a laro gloér ho mestroni

Komz a hreint ag ho(us) obéroù kaer.

 

 

Pennad tennet ag an eil lihér a Sant-Paol Apostol d'an Tessalonisianed (2Th 1, 11-2,2).

 

Breudér, pédein a hram aveidoh, heb arsaù, eid ma kavo an Aotrou Doué é véritet ar galv en-des davéet ; dré é helloud, plijeet geton ma hréet ar mad a hoantet, ha ma lakei ho fé doned de voud obériant.

Elsé é kavo ar Salvér Jézuz é hloér énnoh, ha hwi énno. Chetu ar péh a hra grès hon Aotrou Doué hag hor Salvér Jézuz Krist.

Breudér, goulenn a hram genoh un dra a-zivoud donedigeh hor Salvér Jézuz Krist hag hor tolpad-ni éndro dehon ; ma vo lakeit àr hor hont ur soñj, ur gomz, ul lihér hag a gemenn éma arriùet dé ar Salvér, ne gollet ket ho penn, n'um lesket ket de voud spontet

 

Alleluia.

 

Doué en des karet er bed ha groeit aveidon é vab ungañnet. Peb den hag e gred ennon, en devou er buhé peurbadus.

 

Aviél Jézuz-Krist revé Sant Lukaz (Lc 19, 1-10) :

 Jézuz a arriùas é Jériko hag a dreuzas ar gêr. Boud a oé éno un dén hanùet Zaché, ur reseùour-taosour, ha pinuig braz a oé-éan. Klask a hré gwéled Jézuz ha n'hellé ket anehon ged an dud, rag un dénig bihan a oé ; éan a réd enta éraog hag a grap àr ur wéenn eid ar gwéled ; dré-zé é télié tremén Jézuz. A p'arriù én tachad-sé é saù Jézuz é zaoùlagad d'al lué hag a lar dehon :

« Zaché, deit fonnabl d'an diaz, rag én ho ti é rekan chom hiriù. »

Ha Zaché a zichenn a herr, ha éan d'en dégemér ged leùiné.

E wéled kement-sé an oll a vourbouté én ur lared : « De di ur péhour éma oeit de lojein. »

Neoah Zaché, én é saù, dirag ar Salvér a lar dehon : « Aotrou, éh an de rein an hantér a me madoù d'ar beurerion, ha mar em-es groeit gaoù doh unan bennag, ne vern é petra, me zakoro dehon pedèr gwéh kement arall.

Jézuz a lar neuzé : « Hiniù éma deit ar salvedigeh d'an ti-man, dré m'éma hennen eùé ur hroèdur d'Abraham. Rag, deit é Mab-an-Dén de glah ha de salvein ar péh a oé kollet. »