An overenn santél
           Eskopti Gwéned          
              

 

Pedenn digor

Aotrou Doué, mestr ha krouéour peb tra, taolet ur sell àrnom ; hag aveid ma anaùeem ho karanté, reit deom d’ho servijein ged ur galon digor
dré Jézus-Krist, ho Mab, or Salvér hag on Doué, a viù genoh ha ged ar Spered Santél, a oll viskoazh de virùikén.

Pennad tennet a Livr an Divroadur.

 

Én amzér-hont, é komzas an Aotrou Doué de Voiz :
Kerhet, diskennet rag ur fall pleg en-des tapet ar bobl, an hani ho-poé tennet a vro Ejipt.
N’o-des ket laket hir amzér aveid troein kein d’an hent em-boé gourhemennet dehé.
Groeit o-des ur sort lé potin hag en em zaoulinet o-des diragzon. Kinniget o-des dehon sakrifisioù én ul lared :
Pobl Izrael, chetu ho touéed, ar ré o-des o zennet a vro Ejipt.

An Aotrou Doué a laras hoah de Voiz :
Gweled a hran ar bobl-sé a zo ur bobl kalet hé fenn.
Breman, laosket mé de ober. Eh a me hounnar de intanein énebté. Eh an d’o lahein oll.
Med, azohoh, gober a hrein ur bobl vraz.

Moiz a zistannas kounnar an Aotrou Doué én ur lared :
Perag, Aotrou Doué, é sauehé ho kounnar éneb d’ho pobl, an hani ho-pes tennet a vro Ejipt dré gelloud braz ho torn nerzhuz ? Dalhet sonj ag ho serviterion, Abraham, Izaac hag Izrael, ar ré ho-pes grateit dehé :
Lakad a hrein de greskein ho ligné èl stered én néañv. Me rei, èl m’em-es grateit deoh, oll ar vro-man de dud ho ligné de virùikén.

An Aotrou Doué a chomas heb ober d’é bobl an droug a oé bet én é sonj.

Psalm 50

 

Ho pet sonj ahanon, men Doué, ged karanté
 

Ho pet truhé dohon, o men Doué, revé ar vrasted a ho madelezh.
Revé ar vrasted a ho karanté, lammet a-ziàrnon me fallanté.
Golhet mé muioh-mui a me lousoni
Pelleit me féhédoù azohon.

 

Men Doué, krouéet ennon ur galon glan
Ha lakeit ur reizhted neùé ém spéred.
Ne me zaolet ket pell azohoh
Ha ne lamet ket hou Spered santél a m’inéan.

 

O men Doué, digoret men géneù,
Ha me gano mélasion deoh.
Ar sakrifis a blij de Zoué a zo ur spered glaharet ;
O men Doué, ne zisprizet ket ur galon gloézet hag ankinet.

 

Pennad tennet a Lihér Sant Paol de Dimoté

 

Timoté karet
Lan a hred on é kevér an Hani a ra nerh dein, Jézus ar Hrist, or Salvér, rag ean en-des me istimet jaojabl p’en-des reit dein karg de aviélein, dein hag a oé gwézharall touiour, goalgasour ha kri.
Med reit en-des dein é druhé, rag ne ouien ket petra a ren ; difé  a oen.
Skuillet é àrnein grès or Salvér, hag eùé ar fé hag ar garanté a zo é Jézus-Krist.

Chetu ur gomz lan a fé, mad de voud dégeméret heb gortoz : deit é Jézus-Krist ér bed aveid salvein ar béherion ha drest-oll mé an hani ketan anehé.
Rag m’en-des bet truhé dohein, éma aveid ma vo gwélet ennein-mé an oll basianted ag ar Hrist, aveid lakad de voud gwélet ur skwir de beb unan é kredein ennon eid en-devoud ar vuhé beurbaduz.

D’ar roué ar Hantvléadoù, d’ar Roué divarùél ha ne vé ket gwélet, dohton inour ha gloér a oll viskoazh de virùikén. Amen.

 

Alleluia

 

Er Hrist, é laké an Aotrou Doué ar bed abeh de voud é peah geton. Lakeit en-des én or genoù ar gmz santél.

Aviél Jézus-Krist revé Sant Lukas.

 

En amzér-hont ;
Ar bublikaned hag ar béherion a dosté dehon eid er hleùed. Hag ar farizianed hag ar skribed a vourbouté én ul lared : « Hennan a zégemér ar béherion hag a zèbr geté. »

Nezé é larJézus dehé ar homzoù-man :
Più ahanoh, mar en-des kant davadenn ha mar da dehon koll unan anehé, ne laosk an 99 arall én dézerh, eid moned àrlerh an hani zo kollet betag men dé kavet dehon ?
Hag a p’en-des hi kavet éan hé samm àr é ziskoé ged leùiné ; hag én un arriù ér gér, galùein a hra é vignoned hag é amézion : groeit bouruz genein, emé ean, rag kavet é dein an davadenn a oé kollet.
M’el lar deoh, é vo én néañv kement a leùiné a-zivoud ur péhour a hra penijenn él a-zivoud 99 a dud santél n’o-des ket dobér a benijenn.

Ha hoah : pé moéz, mar hi-des deg péh argand ha mar da dehi koll unan anehé, ne laka tan ér goloù, ha ne skub an ti, ha ne glask perhuéh ken nen dé kavet dehi ? Ha, goudé boud ean kavet, galùein a hra hé mignonézed hag amézegézed : groeit bourruz genein, emé hi, rag kavet é dein ar péh argand em-boé kollet.

Elsé, m’el lar deoh, é vo leùiné ged éled an Aotrou Doué a-zivoud ur péhour hebkén hag a hra pénijenn.

Pedenn àr ar provoù.

Chelaoùet or pedennoù ged madelezh, Aotrou Doué ha groeit dégemér vad d’or provoù, eid ma servijou an tonézonioù kaset ged peb unan de salvedigezh an oll
dré Jézus-Krist, or Salvér.

 

Pédenn goudé ar gomunion :

Groeit Aotrou Doué ma tégeméram grès ar sakremant-man én or speredoù hag én or horvoù . Elsé édan hé gelloud ha nepas ar péh a sonjam, é veem rénet berpet geti.
dré Jézus-Krist, or Salvér.