An overenn santél
           Eskopti Gwéned          
              

 

Pédenn-digor :

 

Aotrou Doué, aveid an dud ho kar, ho-pes aozet madoù ne weler ket ; ni ho kar berped hag a dreist peb tra ; strèùet én or halonoù gred ho karanté, eid ma tenneem ahanoh an eurusted grateit genoh hag a zo én tu-rall de beb hoant

dré Jézus-Krist, ho Mab, or Salvér hag on Doué, a viù genoh ha ged ar Spered Santél, a oll viskoazh de virùikén

 

Pennad tennet a Livr Jérémi.

 

Er prantad-sé, épad séziz Jéruzalem,
tré ma oé Jérémi ér prizon,
é laras ar brinsed d’ar roué Sédésias :
« Revo lakeit an dén-sé d’ar marù,
rag én ur gomz èl ma hra,
digalonekad a hra ar péh a chom a soudarded é kér hag ar boblans abèh.
Nen dé ket eurusted ar bobl a glask an dén-sé med é gwaleur »

Ar roué Sédésias a laras dehé :
« éma étré ho taouorn
ha ne hell ket mui nitra ar roué a-éneb deoh ».
Ind a grogas neuzé é Jérémi hag en taolas é puñs Melkiaz, mab ar roué, é kreiz porzh ar goardoù.
Ind en diskennas d’an dias ged funioù.
Er puñs-sé, ne oé ket deur ebet, nameit fank. Jérémi a yas don ér fank.

Ebed-Mélek, servitour ar roué, én un doned ér méz a baléz ar roué, a laras dehon :
« Roué me Mestr,
fall é ar péh en-des groeit an dud d’ar profet Jérémi.
Taolet o-des ean ér puñs ha merùel a hrei ged an naon,
rag n’en-des ket mui bara é kér ! »

Ar roué a ras ar hourhemenn-man de Ebed-Mélek an Ejipsian :
« Keméret genoh tregont dén
ha tennet ér méz ag ar puñs ar profet Jérémi éraog ma varùo ».

Psalm 39

 

O men Doué, deit fonnabl d’em sekour

 

Pell amzér, ged fians,
Em-es gorteit an Aotrou Doué,
Ha taolet en-des é sell arnon.
Chelaouet en-des me fedenn

 

Me zennet en-des ag ar vouillenn don
Eh oén abarh é stad truheg
Sonneit en-des me zreid àr ar roh
Ha rénet oll me fazoù

 

Lakeit en-des é me genoù ur werzenn neùé,
de lared mélasion de men Doué.
Kalz a dud, é wéled kement-sé, a zoujo Doué,
hag a lakei o honfians énnon

 

Eidon-mé, me zo peur ha diovér em-es a beb tra
Med Doué en-des soursi ahanon.
Hwi é men goarnour ha oll me sekour ;
Ne zerénet mui enta, o men Doué

Pennad tennet a Livr Sant Paol d’an Hébréed

 

Mem bredér,
Ni eùé hag on-es én-dro deom kement a destoù, taolam peb samm ha drestoll ar péhed or gronna ken stert. Rédam heb diskuizh d’ar stourmad a zo kinniget deom, on daoulagad staget doh Jézus, an hani a zo orin ha termén ar fé.

En ur droein kein d’al leùiné kinniget dehon, gouzañvet en-des ar groéz én desped d’ar véh hag azéet én tu déhoù dron an Aotrou Doué.
Keméret skwir àr an hani en-des gouzañvet éneberezh ar béherion. Elsé ne veet ket mui sammet ged ar fallgaloni.

N’ho-pes ket hoah dalhet penn betag ar goad én ho stourmad éneb d’ar péhed.

 

Alleluia
Men deved a chelaou doh mem boéh, emé an Aotrou ;
M’o anaù hag me heli a hrant.

Aviél Jézus-Krist revé Sant Lukas.

 

En amzér-hont, Jézus a laré d’é zisipled :
« Deit on de zégas an tan àr an douar, ha petra a fall dein mé nameid ma krogo !
Deli é dein reseù ur vadéent, ha na goasket é me inéan betag m’arriùo genein :
hwi a gred éh on deit àr an douar de rein ar peah ?

Pas ! a laran deoh ; mes deit on d’ober disparti.
Rag, a vreman, én un ti ma es pemp a dud, é veint dispartiet tri éneb de zaoù ha daoù éneb de dri.
Dispartiet a vo an tad éneb d’ar mab
hag ar mab éneb d’an tad,
ar vamm éneb d’ar verh
hag ar verh éneb d’ar vamm,
ar vammeg éneb d’ar verheg
hag ar verheg éneb d’ar vammeg ».

 

Pedenn àr ar provoù.

 

Plijet genoh Aotrou Doué, dégemer ar péh a gennigam aveid ar sakremant ag an aotér, léh ma um-hra un eskemm ha n’en-des ket é bar ; én ur gennig ar péh ho-pes groeit deom, ni a hello ho reseù é gwirioné,
dré Jézus-Krist, or Salvér

 

Pédenn goudé ar gomunion :

 

Pédam an Aotrou Doué
Aotrou Doué, én ur reseù or Salvér ér sakremant, hwi ho-pes on staget muioh-mui doh ho mab Jézus ; ni ho ped hoah : groeit deom de voud hanval dohton àr an douar ha de voud lodeg én é gloér én néañv

dré Jézus-Krist, or Salvér