30ved sulieg
Pedenn aveid digor
Aotrou Doué peurbadel hag oll-gelloudeg,
lakeit de greskaad énnom ar Fé, an Espérans hag ar Garanté.
Aveid sekour genem kavouid ar péh a bromètet,
reit deom ar hrès de garein ar péh a hourhemennet.
Dré Jézuz Krist ho Mab, on Salvér hag on Doué,
a viù genoh hag ged ar Spered Glan,
a oll viskoah de virùikén. .
Pennad tennet a Livr ar Profèt Jeremy. 31,7-9
Chelaouet komzoù an Aotrou Doué :
Huchet a bouéz-penn aveid Jakob,
groeit inour d'an hani ketañ ag ar broioù.
Lakeit ho meuleudi de drouzal, ha youhet oll :
"Aotrou Doué, salvet ho pobl, restad Israël !"
Sellet : m'o laka de zoned d'ar gér a vroioù ar hreiz-noz,
m'o dastum ag ar penn-arall ag ar bed.
En o mesk, é kavér un dén dall, un dén kamm,
ur voéz é toug, ur voéz yaouank fresk gulvoudet.
E mant un nivér braz a dud é toned d'ar gér.
Oeit a oent kuit é ouilein; m'o laka de zoned éndro ged konfort.
M'o ambroug de gavet deur sklér, dré un hent plijuz,
émen ne strebaoteint ket.
Rag me zo un tad aveid Israël, Efraïm a zo me mab kohañ.
Chetu ar péh a lâr an Aotrou Doué.
Psalm 125/126
Traou kaer en-des groeit deom an hani zo ihuél.
Re vo de virùikén meulet é hanù santél.
Pe blijas d'an Aotrou Doué tennein é bobl ag ar sklavaj,
pebéh ur joé aveidom !
Ne hrem meid kañein ged ar joé,
ha lared gwerzennoù a leùiné.
Kleùein a hrèt neuzé ar pobloù é lared :
Traoù kaër en des groeit an Aotrou Doué én o hevér.
Ya, an Aotrou Doué en des groeit traoù kaër én or hevér.
Bourrabl a oé genem.
Dégaset d'ar gér, ô men Doué, ar brizonerion
èl goahiadoù-deur én dezerh.
Ar ré a had émesk an daroù
A hrei an est ged leùiné.
Ind a yé ged o hent, daroù én o daoulagad,
é hadein o grañ én èrui.
Ind a zey éndro é tansal.
ged o feskad àr o diskoé.
Pennad tennet ag ar Lihér d'an Hebréañed. 5, 1-6
Ar Béleg-Meur a zo berped choéjet émesk an dud.
E garg a zo d'obér én dro d'an dud
ér péh a sell o aférioù ged an Aotrou Doué.
Eañ a zeli kenig provoù ha sakrifisoù aveid ar péhedoù.
Eañ a hell kompren ar béherion dré zihouiegeh pé dré zivarchereh
(ceux qui sont pécheurs par ignorance ou par égarement)
rag eañ a zo eùé lañ a hoannedigeh.
En arben ag ar hoannedigeh-sé,
eañ a zeli kenig sakrifisoù aveid é béhedoù
hag aveid péhedoù ar bobl.
Dén e-bed ne hell kemér aveid eañ-mem an inour-sé.
Reseùet a vér dré galv an Aotrou Doué, èl Aaron.
Elsé é ma bet groeit aveid an Aotrou Krist.
A pen dé deit de voud Béleg-Meur,
nen dé ket eañ mem en des keméret an inour-sé.
An Aotrou Doué é en des reit an inour-sé dehon,
a pen des laret dehon : Hwi zo me Mab.
Mé, hiziù, mem es ho engehentet (engendré).
Hag én ur psalm arall : Hwi zo beleg de virùikén,
hrevé lid Melkisedek.
Alleluia
Re vo benniget an Aotrou, on Doué.
D'ar ré zo azéet én tioélded,
lakeit en des de streganein é splanndér.
Aviél on Salvér Jézuz Krist hrevé sant Mark 10, 46-52
El ma lammé Jézuz a Jeriko ged é zisipled
hag un anfin bras a dud, bout e oé un dén dall,
hanùet Bartimé, de lared é mab Timé, chouket àr ribl an hent.
Pe gleù lared é oé Jézuz a Nazaret énno,
ean um laka de huchal : Jézuz, Mab David, ho pet truhé dohein.
Eleih a dud a hourdrouzé geton eit el lakaad de daùein.
Mes ean a huché hoah kriùoh : Mab David, ho pet truhé dohein.
Neuzé Jézuz a arsaù a gerhed, hag e lar : Galùet ean.
Ha galùein a hrér an hani dall, én ul lared dehon :
Keméret kalon, saùet, éma doh ho koulenn.
Ha ean de durel é vantell, de seùel fonnabl,
ha de voned aben én ur rideg betag Jézuz.
Jézuz a houlenn geton :
Petra a houlennet genein gobér aveidoh ?
--- Rabbouni, groeit ma huélein.
Ha Jézuz a lar dehon : Kerhet, ho fé en des ho salvet.
Kentéh, é tas ar gwéled dehon, ha ean de heli Jézuz àr an hent.
Pedenn àr ar provoù
Pédam, mem breudér, ma plijo de Zoué hon Tad digemér ar sakrifis a gennigam deoh oll àr un dro aveid gloér é hanù santél ha salvedigeh ar bed abéh.
Taolet ur sell, Aotrou Doué, àr ar provoù on es degaset dirag ho taoulagad. Lakeit-ni de lidein an overenn-man aveit ho prasan gloér.
Dré Jézuz Krist on Salvér.
Pedenn goudé ar gomunion
Reseùet on es, Aotrou Doué, Sakramant an Aotér.
Lakeit grès ar gomunion de chom berped biù én or halonoù.
Elsé, é helléem arriù un dé ér Baradouiz,
ha biùein genoh euruz de virùikén.
Dré Jézuz Krist on Salvér.