32ved sulieg
Pédenn-digor :
Doué oll-gelloudeg ha lan a vadelezh, pelleit azohom ar péh a zo a dreuz d’on hent. Elsé digabestret a spered hag a horv, é vam é stad d’ober a galon vad ho vennanté,
Dré Jézus...
Lennadenn Livr ar Furnéz
Lugernuz é ar Furnéz ha ne goll ket é splanndér.
Lezel a hra ar ré hé har de selled dohti
hag ar ré hé hlask d’hé havouid.
Hi en em ra de anaùouid ar getan d’ar ré o-des hoant anehi.
Ne vo ket biskoazh skuizh an hani hé hlask adal goleu-dé.
Hé havouid a hrei azéet étal an nor.
Sonjal anehi a zo pazenn ihuélan an anaùidigezh.
Hag an hani a chom de veilhal én arbenn dehi a vo kentèh disoursi ag é bredér.
Moned ha doned a hra de glask ar ré a blij mad dehi :
é kamdro an hentoù, dizolein a hra dehé hé fas minhoazhuz ;
é peb unan ag o sonjoù, doned a hra én àrbenn dehé.
Psalm 62
En ur sonj ahanoh, séhed en-des me iné.
Doué, o men Doué, ho klask a hran adal goleu-dé
Séhed en-des me inéan ahanoh
én ur sonj ahanoh, goannad a hra me horv,
Douar séh, fondet ha dizeur.
Ho kwélet em-es én ho iliz-braz
Gwélet em-es ho nerzh hag ho kloér.
Gwelloh é ho karanté eid ar vuhé.
Berped a vo ar meleudi àr men geneu.
Ho pennigein a hrein hed mem buhé.
En ur vélein ho hanù, é saùein men daouorn.
Men goalh em-bo èl ged ur pred braz.
Mélasionoù a ganein, leùiné é men geneu.
Gouarn sonj ahanoh a hran bamnoz
Ha chomel a hran élsé én ur gomz dohoh.
Ya ! Deit oh d’em sekour :
Youhadennoù a ganan édan skeud ho tiùaskell.
Lennadenn tennet a Lihér getan Sant Paol de gristenion Tesalonik
Mem bredér,
Ne fall ket dein ma chomet dihouieg a-zivoud ar ré varù, eid ne véet ket ankinet èl ar ré n’o-des ket a espérans.
É gwirioné, mar kredam en-des Jézus marùet, ha saùet goudé a varù de viù, kredam eùé é hrei Doué d’ar ré varù seùel dré nerzh Jézus eid boud unañnet geton.
Rag chetu ar péh a zisklérian deoh, èl m’em-es en disket ged ar Salvér :
« Ni oll hag a zo biù, é hortoz ma tei Jézus eid or barnein, ne ieem ket diragton éraog ar ré a zo marù.
A pe vo deit an eur merchet, pe vo kleùet boéh an Arhél ha son an drompilh, or Salvér ean-mem a zichenno ag an néañv, hag ar ré a zo marù é karanté Jézus-Krist a saùo ar ré getan.
Goudé-sé, ni ar ré viù chomet àr an douar betag nezé, é véem saùet àr un dro geté én èbr eid moned én arbenn de Jézus-Krist hag èlsé é véem ged Doué de virùikén.
En em gonfortet enta an eil égilé ged ar homzoù a laran deoh. »
Alleluia
Béet enta prest hwi eùé,
pen-dé-gwir ne ouiet ket de bed eur
é teli doned Mab-an-Dén. Alleluia
Aviél or Salvér Jézus-Krist revé Sant Maheu
En amzér-hont, Jézus a laras d’é zisipled :
rouantelezh an néañv a zo hanval doh deg gwerhiéz
hag a geméras o lamproù
de voned én arbenn d’an naou bried.
Pemp anehé a oé diaviz ha pemp a oé fur.
Ar pemp a ré ziaviz a geméras o lamproù
heb kas ivl geté ;
ar ré fur a geméras podadoù ivl
àr un dro ged o lamproù.
El ma teréné ar pried,
ind oeit ha morennet oll ha kousket.
Mes de greiznoz
chetu saùet ur voéh a gleùér é krial :
« E ta ar pried, kerhet én arbenn dehon. »
Kentèh oll ar gwerhiézed-hont de seùel
ha de gampenn o lamproù.
Mes ar ré ziaviz a lar d’ar ré fur :
« Reit deom ivl ag ho hani,
éma ol lamproù-ni é verùel. »
Ar ré avizet a reskond :
« ged eun ne vehé ket erhoalh aveidom hag aveidoh,
kerhet kentoh de di ar varhadizion
ha prénet aveidoh. »
Mes tréma oent é voned de brénein,
é tas ar pried,
hag ar ré a oé prest a yas geton de di an éred,
hag é oé bet cherret an nor.
An taol devéhan,
é tas eùé ar gwerhiézed arall.
« Aotrou, Aotrou, emé ind, digoret deom. »
Mes hannan a reskond dehé :
« É gwirioné, m’el lar deoh, n’ho anaùan ket.
Euéhet enta,
rag ne ouiet ket nag an dé nag an eur. »
Pedenn àr ar provoù.
Plijet genoh Aotrou Doué, turel ur sell a bardon hag a beah àr ar provoù-man : èlsé én ur lidein pasion ho Mab, é keméram pérh, a greiz kalon, én ho mistér.
…dré Jézus
Pédenn goudé ar gomunion :
Kriùet ged ar magadur santél-man, é ram deoh mélasionoù hag é pedam ho madelezh heb par.
Ni ho ped eùé ma lakei de badein ar Spered Santél ér reihted ar ré o-des reseùet an nerzh ag an néañv.
…dré Jézus