An overenn santél
           Eskopti Gwéned          
              

 

 Pédenn-digor :

 

Doué peurbaduz hag oll-gelloudeg, rénet-ni betag eurusted an néanv.

Groeit ma arriùo ar vandenn, deusto d’hé goannedigezh léh m’éma digoéhet trézhiuz ar bugul.

 Dré Jézus-Krist ho Mab, or Salvér hag on Doué, a viù genoh ha ged ar Spered santél, a oll viskoah de viruikén.              

 

 

Lénnadenn ketan :

 

Pennad tennet a Livr Obéroù an Apostoled (Ac 2, 14a.31-41):

Dé ar Pantekost, én é saù ged an unneg apostol arall, é komzas èlsè Pier, én ur lared kriù ha splann :

Tud Israel, red é deoh gouied kement-man : ar mem Jézus ho-pes lakeit de veruel àr ar groéz,

an Aotrou Doué en-des groeit anehon, ar Salvér hag ar Hrist”.

Ar ré hag a oé doh er chelaou a oé treboulet é kreiz o halon ;

ind a laras de Bier ha d’an Apostoled arall : “Breder, petra a zeliam-ni ober ».

Pier a reskondas dehé : “Distroeit de Zoué ha revo badéet peb unan ahanoh

é hanù Jézus-Krist eid en-devoud pardon é béhédoù.

Nezé, é reseùeèt donézon ar Spered Santél.

Aveidoh é ar péh en-des grateit an Aotrou Doué,

aveid ho pugalé, aveid oll ar ré a bell, oll ar ré hag a galùo an Aotrou Doué ».

Pier a gavas hoah gérioù arall eid o lakad de gredein én ur lared dehé :

« Distroeit ag ar rummad fariet-man hag é veèt salvet ».

Nezé, ar ré hag en-doé dégeméret komzoù Pier a zas de voud badéet

hag é kreskas an dé-sé a dri-mil nivér ar gristénion.

 

 

Psalm 22

 

Mem bugul é an Aotrou Doué :

N’em-es ket diovér a nitra.

 

Mem bugul é an Aotrou Doué :

N’em-es ket diovér a nitra.

Àr yeot fresk ar pradoù,

en um laka de ziskuizh.

 

Kaset on geton dirag an deurioù sioul

Ha lakeit on de viùein éndro ;

Dré an hent just éh on ambrouget

Én inour d’é hanù.

 

Ma treuzan touloù ar marù

Ne zoujan ket droug ebet

Hwi zo men gouarnour

Hag a ra dein konfortans.

 

Aozet ho-pes an daol aveidonn

Dirag m’enéberion ;

Hwi a daol ur frond hwék àr me fenn

Ha lanet é me halis.

 

Grès ha eurusted a zo genein

Bamdé épad men buhé ;

Me chomo é ti an Aotrou Doué

Hed mem buhé

 

 

Eilved lénadenn

 

Pennad tennet a lihér ketan Sant Pier Apostol (1P 2, 20-25) :

Aveid an dra-sé éh oh bet galùet, rag m’en-des gouzanùet ar Hrist aveidoh ;

ean en-des groeit deoh é skwir aveid ma heulieét é basoù ;

ean n’en-des jamès péhet na laret gaouiér erbet ; anjuliet, ne anjuliet ket anehon ;

lanet a gloéz, ne hourdrouzé ket anehon, med é ré é fians d’an hani a varn ged reizhted.

En é horv, douget en-des or péhédoù àr ar groéz eid ma hellehem merùel d’or péhédoù ha biùein ér reizhted :

dré é houlioù éh om éseit.

El deved, éh oeh baléerion bro ;

mes a-vreman eh oh deit éndro d’ar bugul a chom dihun étaldoh.

 

Alleluia

 

Jézus ar bugul mad a anaù é zeved hag é zeved en anaù ; reit en-des é vuhé aveité

 

 

Aviél Jézus-Krist revé Sant Iehann (Jn 10, 1-10)

 

Elsé é komzé Jézus d’ar Farisianed : E gwirioné, é laran deoh :

an hani a za abarh ar hraou-deved heb treuzein an nor,

med én ur grapein dré ur léh arall, hennezh é ul laer hag ur torfétour.

An hani a za abarh én un dreuzein an nor, hennezh é ar bugul, bugul an deved.

Ar porher a zigor dehon hag an deved a chelaou doh é voéh.

Ean a galù peb unan ag é zeved dré é hanù, hag o laka de voned ér méz.

Pen dint ér méz, é kerh én o raog hag ind en héli, rag ind a anaù é voéh.

Jamès ne hélieeint unan disanaùet. Ind a iei kuit pell azohton rag ne anzaùant ket boéh ar ré disanaùet ».

Jézus a geméras an hanvaladenn-man én ur gomz d’ar Farisianed

med ne gomprenent ket ar péh a fallé dehon lared.

Chetu perag Jézus a laras hoah : “E gwirioné, é laran deoh :

éh on dor an deved. Ar ré a zo deit é me raog, a zo oll laererion ha torféterion ;

med an deved n’en-des ket ind chelaouet. Mé, éh on an nor.

Mar ta abarh unan bennag drézon, salvet a vo ;

ean a hello moned ha doned hag a gavo ur prad de vouitad.

Al laer ne za nameid aveid laereh, dihougein ha diskarein.

Deit on mé eid ma o-devo oll an dud ar vuhé reseùet ged larganté.

 

 

 

Pedenn àr ar provoù.

 

Plijet genoh, Aotrou Doué ma reem deoh grès eid mistérioù Pask ;

ma hreint de badein énnom ho labour a salvedigezh,

ha ma veint ur vammenn a leùiné peurbaduz

Dré Jézus-Krist or Salvér.                

 

 

Pédenn goudé ar gomunion :

 

Aotrou Doué oll-gelloudeg ha bugul lan a vadelezh, taolet àr ho pugalé ur sell a dinerded ;

salvet on bet dré hoed ho Mab. Digoret aveidom un demenrans é Rouantelezh an Neanv.

Dré Jézus-Krist or Salvér.