An overenn santél
           Eskopti Gwéned          
              

Pedenn de zigor

Aotrou Doué, hwi é vamenn peb madelezh hag oll druhé a za ahanoh ; laret ho-pes penaos esaad ag ar péhéd dré ar yun, ar bedenn hag an alézon ; chelaouet diskarg or goannedigezh : anzaù a hram ur péhédoù ; ged ho pasianted, lakeit-om àr saù ged karanté.

Dré Jézus-Krist ho Mab, or Salvér hag on Doué, a viù genoh ha ged ar Spered santél, a oll viskoah de viruikén.

 

Pennad tennet a Livr an Divroadur.

 

Én déioù-sé, é kreiz an déserh, dré vank a deur, éma ar pobl gouzanùet ged ar séhed.
Ha chetu an dud é klask trouz doh Moïz, én ul lared dehon :
« Perag ho-pes groeit deom kuitad Bro Ejipt, aveid gober deom merùel ged ar séhed, ni hag or bugalé hag or loned ? »
En ur gomz kriù doh an Aotrou, é laras Moiz :
« Petra a hrein mé aveid ar bobl-man ? Tuchant éh ant d’em lahein a daoloù mein ! »
An Aotrou a reskondas de Voiz :
« Treménet dirag ar bobl, keméret genoh lod a zud kozh Izrael,
Lakeit én ho torn ar penn-bazh ho-poé skoeit ar stér Nil geton ha kerhet !
Me vein mé genoh, diragoh-hwi, àr ar Mané Horeb.
Hwi a skoei doh ar roh,
Hag an deur a strimpo anehon.
Hag oll ar bobl a évo. »
Ha Moiz a hras elsé dirag daoulagad tud kozh Izrael.

Hanùein a hras Massa al léh-sé, de lared é trebilh, ha Meriba, de lared é tabut,
én arbenn m’en-doé pobl Izrael klasket trouz doh an Aotrou hag en-doé ean lakeit é poén én ul lared :
« Hag éma an Aotrou Doué genom pé nen dé ket ? ». 

 

Psalm 94

Diskan

Digoret ho kalon doh boéh an Aotrou Doué (GdZ p 22)
pé

Hiziù, ne cherret ket ho kalon
med chelaouet doh boéh an Aotrou.

 

Deit ha kanam ged leùiné

Bennigam or Mestr hag or gouarnour.

Tostam de Zoué én ur lared trugéré

Dré or han, mélam on diwennour

 

Pléget ho penn ha daoùlinet !
Adoram an Aotrou, or Hrouéour.
E gwirioné,  Ean a zo  on Doué ;
Ha ni, é bobl hentet mad dré é zorn.

 

Hiziù, kleùet é gomzoù santél :

 Ne cherret ket ho kalonoù,
 El ho kourdadoù én dézerh,

a p'o-doé saùet éneb dein !

 

 

 

Lennadenn Lihér Sant Paol d’ar Roméned

 

Mem bredér,
Ni hag a zo deit de voud just dré ar fé, chetu ni é peah ged an Aotrou Doué, dré or Salvér Jézus-Krist, an hani en-des reit deom, dré ar fé, de voud lañet ged ar hrès. Enni é lakam or lorh, én espérans de voud lodeg é Gloér Doué.

Hag an espérans-sé ne zipito ket pegwir éma bet streùet karanté Doué én or halonoù, ged ar Spered santél a zo bet reit deom.
Nezé, èl ma oem dihelloud, d’an eur merchet ged Doué, é varùas ar Hrist eid salvein tud difé èl ma oem.

Diés é dija eid un dén just dégemér ar marù..
Marsé é kavehér unan bennag prest de verùel eid un dén mad.
Hama, merch éh om karet ged Doué a zo én é varù eidom pe oém nameid péherion

 

Youhadenn

 

E gwirioné, hwi é an Aotrou, Salvér ar bed.
 Reit dein ag an deur biù-sé eid ma n’em bo ket kén séhed.

 

Aviél Jézus-krist revé Sant Iehann

 

En amzér-hont
Donet a hras Jézus d’ur gér ag ar Samari a larér Sikar anehi, étal an douaroù en-doé Jakob reit d’é vab Jojeb.

Enno, éh oé puns Jakob. Jézus enta, skuizh ged an hent, a ias d’azé àr varlenn ar puns. Ardro hweh eur éh oé nezé. Doned a hras a Samari ur vouéz de dennein deur.

Jézus a lar dehi :
« Ra dein d’éved ».
Rag oeit a oé é zisipled é kér de brénein biùans.
Mes ar vouéz a samari a lar dehon :
« Penaos hwi, ur Juif, hwi a houlenn d’éved genein-mé, ur vouéz a Samari ? «
Rag ar Juifed ne zarempredant ket ar Samariténed.

Jézus a reskond hag a lar dehi :
« Pe anaùehes donézon Doué ha più é an hani a lar dis : « Ra dein d’éved », marsé t’ah-pehé té goulennet geton ha ean en-dehé reit dis deur biù ».

Ar vouéz a lar dehon :
« N’ho pes nitra de dennein deur hag ar puns ; hennen a zo don.
A beban enta ho-pehé hwi an deur biù-sé ?
Ha hwi a zo brasoh eid on tad Jakob en-des reit deom ar puns-man, en-des éved anehon, ean, é vugalé hag é loned ? »

Jézus a reskond hag a lar dehi :
« A gement a év ag an deur-man en-devo hoah séhed.
E kontrel, an hani a évo ag an deur a rein mé dehon, birùikén n’en-do mui séhed, mes an deur a rein mé dehon a zei énnon de voud ur vammenn deur a strimp betag ar vuhé peurbaduz. »
Ar vouéz a lar dehon :
« Aotrou, reit dein ag an deur-sé, eid ma n’em-bo kén séhed ha ma nen dein ket mui de dennein deur aman. »

Jézus a lar dehi :
« Kerh, galù ah bried, ha des aman ».
Ar vouéz a reskond :
« N’em-es ket a bried. »
Jézus a reskond dehi :
« Laret mad ah-pes : n’em-es ket a bried ; rag pemp bried ah-pes bet hag an hani ah-pes breman n’é ket pried dis,
Azé te lar ar hwirioné. »
Ar vouéz a lar dehon :
 

 

Aotrou, gwéled a hran éh oh hwi ur profet.
On tadoù en-des adoret àr ar mané-man ha hwi a lar hwi éma é Jéruzalem en em gav al léh man dé red adorein. »

Jézus a lar dehi :
« Mouéz, kred mé, doned a hra an eur ne vo, nag àr ar mané-man, nag é Jéruzalem, é adoréet an Tad.

Hwi ador, hwi, ar péh n’anaùet ket, ni ador-ni, ar péh a anaùam ; rag ar salvedigezh a za ag ar Juifed.
Mes doned a hra an eur, breman mem é, ma vo adoret an Tad, a spered hag é gwirioné, ged ar wir adorizion.
Rag an Tad a glah ré elsé d’en adorein.

Doué a zo spered hag ar ré en ador a zéli en adorein a spered hag é gwirioné. »

Ar vouéz a lar dehon :
« Goud a hran é ta ar Mési, an hani a larér Krist anehon.
Hag, a pe vo deit hennezh, é tisko deom peb tra. »

Jézus a lar dehi :
« Mé mem é hag a zo é komz dohis. »

Ha kentéh é tas é zisipled ha souéhet oent ma komzé doh ur vouéz.
Hanni neoah ne laras :
« Petra a glasket-hwi,, pé, perag é komzet-hwi dohti ? »

Nezé, ar vouéz a laosk hé fod éno, a ya é kér hag a lar d’an dud-hont :
« Deit de wéled un dén hag en-des laret dein oll ar péh em-es groeit ;
Ha n’é ket ean é ar Hrist ? »
Hag ind ér méz a gér de voned d’er haved.

Epad an amzér-sé, é zisipled a zalhé àrnehon én ul lared :
« Mestr, dèbret. »
Mes ean a lar dehé :
« Ur biùans em-es mé de zèbrein n’er anaùet ket hwi. »
Hag an disipled a laré an eil d’égilé :
« Ha ean en-dehé unan bennag dégaset dehon de zèbrein ? »
Jézus a lar dehé :
« Mem biùans a zo gobér volanté an Hani en-des m’en davéet eid kas é labour betag ar penn.
Ha ne laret ket hwi-mem :
Hoazh pewar miz hag é vo deit an est ?
Ha mé, me lar deoh :
Saùet ho taoulagad ha gwélet ar mézoù ; a vreman émant gwenn prest d’an est.

A vreman an estour  a reseù é hopr hag a cher fréh eid ar vuhé peurbaduz, hag elsé an hadour  a vé él leùiné àr un dro ged an estour.
Rag a-zivoud an dra-man, éma gwir lared :
Unan a had, un arall a est.
Mé mem ho kaset em-es d’estein ar fréh heb poén. Ré-rall en-des labouret ha hwi a-hues estet ar fréh. »

Paot a Samariténed ag ar gér-sé a gredas ennoñ, diàrbenn komz ar vouéz en-doé testoniet:
« Laret en-des dein, emé hi, oll ar péh em-es groeit. »
Pe oé deit enta ar Samariténed d’er haved, ind er pedas de chom geté.
Ha chom a hras enno daou zé. Hag éleizh mui a dud a gredas ennon, doh er hleùed é komz.
Ha lared a hrent d’ar vouéz :
« Breman, n’é ket mui én arbenn ag ar péh ah-pes laret é kredam :
Rag kleùet on-es ni-mem ha goud a hram éma ean é gwirioné, Salvér ar bed. »

 

 

Pedenn àr ar provoù.

Dré ar sakrifis-man, Aotrou-Doué, plijet genoh ha ged ho madelezh ma vo énnom gwir volanté de bardonein d'or bredér, pegwir é pedam aveid kaouid pardon or péhedoù.
Dré Jézus-Krist or Salvér.

 Pedenn de achiù.

Reseùet on-es, Aotrou Doué un donézon ag an néañv, é tébrein àr an douar-man bara ar rouantelezh. Ho pedein a hram hoazh ur wézh : lakeit de voud biù én or buhé ar péh a zo bet groeit énnom ged sakramant santél an overenn.
Dré Jézus-Krist or Salvér