2ved an Avent
Pédenn-digor :
Pédam an Aotrou Doué,
Doué oll-gelloudeg ha madelezhuz, ne laosket ket tregas on obéroù bamdieg de barraad a gaved ho Mab ; med dihunnet ennom ar spered d’en dégemér ha biùein geton.
Dré Jézus-Krist ho Mab, or Salvér hag on Doué, a viù genoh ha ged ar Spered Santél, a oll viskoazh de viruikén
Lennadenn livr ar profet Izai (11, 1-10)
Komz an Aotrou Doué
Ur barr a zei a-zoh skod Jessé, tad David, ur vronsenn a saillo ag hé grouiad. Arnehon é tischuého Spered ar Salvér : Spered ar furnéz hag an diforh, Spered an Avisted hag an nerzh, Spered an anaùoudigezh ha doujans Doué. Ne varno ket revé ar seblant ; ne ziféro ket revé ar pézh a zo kleùet lared.
Eañ a varno ar ré vihan ged justis, eañ a ziféro ged reihted én tu ged ar ré beur. Èl ur vazh, é gomz a gouézho àr ar vro ; anal é zivéz a zégaso an dén fall d’ar marù. Ar justis a zo gouriz é zigroézell, ha fidélded bodriell é ziùléz.
Ar blei a chomo ged an oén, al loupard a gourvéo étal ar menn-gavr, al lé bihan hag al lionig a vo maget àr-un-dro, ur bugul bihan o honduio. Ar vuoh hag an ourzéz en-devo ar mem perlé, o fologed en-devo ar mem lojeris. Al lion èl an éjon a zèbro ar mem bouétaj. Ar vagadell a hoario àr néh ar hobra; ar hrouédur a astenno é zorn àr toull an naer.
Ne vo groeit nitra fall na goastet àr me mañé santél, rag anaùoudigezh an Aotrou a laño ar vro èl ma vé goleit a zeur ar sol ag ar mor.
An dé-sé, grouienn Jessé, tad David, a vo saùet èl ur banniél d’ar pobloù; ar broioù hé hlasko, hag ar gloér a vo hé demeurans.
Psalm 71 (1-2, 7-8, 12-13, 17)
Dé kaer ha peurbaduz a justice hag a beah
Doué, reit d’ar Roué ho kelloudoù
De vab ar Roué-sé ho justis.
Groeit ma réno ho pobl ged reihted
Ma rei ar pézh zo deliet d’ar peur.
En amzér-sé é vleunio ar justis,
Ur peah braz betag achimant al loérioù !
Revo ar mestr àr ar mor
Hag àr ar stér betag ar penn arall ag an douar.
Eañ a ziboénio ar peur a zo é aspedein
Hag ar hêh dén heb rekour.
Eañ um soursio ag an hani goann hag an hani peur,
an hani peur ma vo salvet é vuhé.
Groeit ma pado é hanù de viruikén
Edan an héol revo dalhet é hanù !
Ennañ revo benniget an oll famillioù àr an douar :
Reveint anzaùet euruz dré ar bed abézh
Lénadenn lihér Sant Paol d'a Romaned (15, 4-9)
Mem breudér, Kement tra a zo él lévrioù Santél a zo bet skriùet aveid on deskein hag en-devoud fians dré ar basianted ha nerzh-kalon.
Mar plij de Zoué ar basianted ha nerzh-kalon rein deoh de voud unañet ér spered ar Hrist.Jézuz. El-sé, ged ur galon heb-kén hag ur memes vouéh é reèt gloér de Zoué, Tad on Salvér Jézuz-Krist.
Um dégeméret an eil d’égilé èl m’en-des groeit Jézuz-Krist dohoh aveid gloér an Aotrou Doué, hwi hag a oé païañed.
Jézuz-Krist a zo deit servitour émesk ar Juifed eid ma vehé anaùet splann fidelded an Aotrou Doué, revé ar pézh a zo bet grateit d’on tadoù; mez, m’el lar deoh éma grès de vadelezh an Aotrou Doué ma hell ar broioù païan er mélein; èl ma lar ar skritur : mé ho mélo émesk ar pobloù, me gaño ho hanù.
Aviél revé Sant Maheu (3, 1-12)
En amzér-sé é arriù Yann ar Badéour ; predeg a hra é dézerh ar Judé :
”Um zistroeit de Zoué, rag rouantelezh an Néañv a zo tost.”
Yann a zo an hani a oé kemennet dré gomz ar profet Isaï : A-dreist an dézerh, ur vouéh a gri “ Kempennet hent an Aotrou Doué, plénneit é hent.” Yann a zougé un dilhad ged pan kanval, hag ur gouriz lér én dro d’an digroézell. Ean a zebré karùed-lann ha mél cherret àr ar mêzoù.
Neuzé éh oé Jéruzalem é toned devaton, ar Judé abézh ha rah ar vro Jourdén. Hag ind a oé badéet geton ér Jourdén épad ma anzaùent o féhedoù.
En ur wéled ar Farizianed hag ar Sadusianed é arriù a vostad eid ma vehent badéet, eañ a laras dehé : “Pennoù naer ! Più en-des desket deoh téhein dirag ar gounar a zo é toned ? »
Douget enta fréh hag a zisko ho tistro de Zoué, ha ne laret ket én ho unan : « Ni on-es Abraham èl Tad, rag m’el lar deoh, ged ar mein-man é hell Doué krouéein bugalé de Abraham. A-vreman éma ar vohal doh grouienn ar gwé ; peb gwéenn ha ne zoug ket fréh mad a vo trohet ha taolet d’an tan.
M’ho padé-mé én deur eid ho tégas de Zoué. Mez, an hani a za àr me lerh a zo kriùoh eidon, ha ne véritan ket lemel é votoù dehon. Eañ ho padéo ér Spered Santél hag én tan.
Derhel a hra ar bâl de wentad én é zorn ; nétad a hrei al leur de zornein ar bléad ; ha cherrein a hrei ar gran én é sulér.
A-fed ar plouz, losket a vo én un tan ha ne vo ket lahet.
Pedenn àr ar provoù.
Pédam an Aotrou Doué,
Piljet genoh Aotrou Doué, ma hounidam ho trugéré ged on pedennoù hag on provoù distér ; n’on-es ket merit ebet; ged ho krès, deit d’or sekour.
Dré Jézus-Krist or Salvér
Pédenn goudé ar gomunion :
Pédam an Aotrou Doué
Lan a grad-vad eid ar bara om bet maget geton, ni ho ped hoazh, Aotrou Doué : disket deom, dré mister ar gomunion-man, priz ar madoù ag ar bed-man ha karanté ré ar baradouiz.
Dré Jézus-Krist or Salvér